‘காலா’ அப்டேட்: சிறுவயது ரஜினி கதாபாத்திரத்தில் தனுஷ்?
ரஞ்சித் இயக்கத்தில் உருவாகி வரும் ‘காலா’ படத்தில் சிறுவயது ரஜினி கதாபாத்திரத்தில் தனுஷ் நடிக்கவிருப்பதாக தகவல் வெளியாகியுள்ளது.
ரஞ்சித் இயக்கத்தில் ரஜினி நடித்து வரும் படம் ‘காலா’. தனுஷ் தயாரித்து வரும் இப்படத்துக்கு சந்தோஷ் நாராயணன் இசையமைத்து வருகிறார். ஹியூமா குரேஷி, நானா படேகர், சமுத்திரக்கனி உள்ளிட்ட பலர் இப்படத்தில் ரஜினியோடு மும்பை படப்பிடிப்பில் கலந்து கொண்டுள்ளார்கள்.
இந்நிலையில், ‘காலா’வில் ரஜினியின் இளம் வயது கதாபாத்திரத்தில் தனுஷ் நடிக்கவிருப்பதாக தகவல் வெளியாகியுள்ளது. இதற்கு படக்குழுவினர் தரப்பிலிருந்து இன்னும் மறுப்பு தெரிவிக்காததால் இந்த தகவல் உண்மையாக இருக்க வாய்ப்பு இருப்பதாக தெரிகிறது. மேலும், இப்படத்தில் பங்கஜ் திரிபாதி முக்கியமான போலீஸ் கதாபாத்திரத்தில் நடித்து வருகிறார். இவர் ‘தபாங் 2’, ‘சிங்கம் ரிட்டன்ஸ்’, ‘கேங்ஸ் ஆஃப் வாஸிப்பூர்’ உள்ளிட்ட பல இந்தி படங்களில் நடித்தவர் என்பது குறிப்பிடத்தக்கது.
